(நேரொரு சிறிதும்)

நேரொரு சிறிதும் இல்லா நின்மலன் தனது வேலால்
     சூருடல் பிளந்தி யாணர் மஞ்ஞையில் தோன்று காலைப்
          பாருல கயின்ற கண்ணன் பங்கயன் அமரர் கட்கோர்
               ஆரமிர் தெய்திற் றென்ன அன்னது கண்டே ஆர்த்தார். ......    1

(ஆர்த்தனர் எழுந்து)

ஆர்த்தனர் எழுந்து துள்ளி ஆடினர் பாடா நின்றார்
     போர்த்தனர் பொடிப்பின் போர்வை பொலங்கெழு பூவின்மாரி
          தூர்த்தனர் அருளை முன்னித் தொழுதனர் சுடர்வேல் கொண்ட
               தீர்த்தனை எய்திச் சூழ்ந்து சிறந்துவாழ்த் தெடுக்க லுற்றார். ......    2

வேறு

(கார்தடிந்து துய்க்கு)

கார்தடிந்து துய்க்குங் கனைகடலின் நீர்வறப்பப்
     போர்தடிந்து செல்லும் புகர்வேல் தனைவிடுத்துச்
          சூர்தடிந்தாய் அன்றே தொழுமடியேம் வல்வினையின்
               வேர்தடிந்தாய் மற்றெமக்கு வேறோர் குறையுண்டோ. ......    3

(மாறுமுகங் கொண்டு)

மாறுமுகங் கொண்டுபொரு வல்லவுணர் மாளாமல்
     நூறு முகமெட்டு நோதக் கனபுரியத்
          தேறு முகமின்றித் திரிந்தேமை ஆளவன்றோ
               ஆறு முகங்கொண்டே அவதரித்தாய் எம்பெருமான். ......    4

(நீதி முறையதனில்)

நீதி முறையதனில் நில்லா அசுரர்புரி
     தீது பலவுளவுந் தீர்ந்தோம் பழியகன்றோம்
          வேத நெறிதொல்லை வெறுக்கையொடு பெற்றனமால்
               ஏதும் இலையால் எமக்கோர் குறையெந்தாய். ......    5

(மன்ற அவுணர் )

மன்ற அவுணர் வருத்திடஇந் நாள்வரையும்
     பொன்றி னவரென்னப் புலம்பித் திரிந்தனமால்
          இன்று பகைமாற்றி எமக்கருள்நீ செய்கையினால்
               சென்றஉயிர் மீண்ட திறம்பெற்ற னம்ஐயா. ......    6

(செய்யும்அவ னும்புல)

செய்யும்அவ னும்புலனுஞ் செய்வித்து நிற்போனும்
     எய்த வரும்பொருளும் யாவையுநீ யேயென்கை
          ஐய அடியேங்கள் அறிந்தனமால் அன்னதனால்
               வெய்ய பவமகன்று வீடுமினிக் கூடுதுமால். ......    7

(ஈண்டே எமரு)

ஈண்டே எமருக் கிடர்செய் அவுணரெலாம்
     மாண்டே விளியும் வகைபுரிந்து காத்தனையால்
          வேண்டேம் இனியாதும் மேலாய நின்கழற்கே
               பூண்டேந் தொழும்பு புகழேம் பிறர்தமையே. ......    8

(என்னா இயம்பி எவரு)

என்னா இயம்பி எவருமினி தேத்துதலுங்
     கொன்னார் அயில்வேற் குமர னதுகேளா
          அந்நா ரணன்விரிஞ்சன் ஆதியாம் வானோர்க்குத்
               தன்னா ரருளின் தலைமை புரிந்தனனே. ......    9

ஆகத் திருவிருத்தம் - 7803