(இப்படி சிலநாள்)

இப்படி சிலநாள் ஏக இதன்மிசை வைகல் ஒன்றில்
     ஒப்பருங் கந்த வெற்பில் உறைவது கருதிச் செவ்வேள்
          செப்புறழ் கொங்கை யோடுஞ் சினகரந் தணந்து செல்ல
               அப்பரி சுணர்ந்து வேதா ஆதியர் யாரும் போந்தார். ......    1

(பெருந்தகை யனை)

பெருந்தகை யனைய காலைப் பிரமன்மால் முதலோர் யாரும்
     விரைந்துதம் பதங்கள் செல்ல விடைபுரிந் தங்கண் வானத்
          திருந்தர சியற்ற விண்ணோர்க் கிறைவனை நிறுவித் தெய்வத்
               திருந்திழை அணங்கி னோடுஞ் சென்றுதன் தேரிற் புக்கான். ......    2

(தேரிடைப் புகுந்த)

தேரிடைப் புகுந்த ஐயன் திறலுடை மொய்ம்பன் பாகாய்ப்
     பாரிடைச் சென்று முட்கோல் பற்றினன் பணியா லுய்ப்பப்
          போருடைச் சிலைவல் லோரும் பூதர்தங் கடலுஞ் சுற்றக்
               காருடைக் களத்துப் புத்தேள் கயிலைமால் வரையிற் போந்தான். ......    3

(போனதோர் காலை)

போனதோர் காலை வையம் பொள்ளென இழிந்து முக்கண்
     வானவன் தன்னை ஆயோ டடிகளை வணக்கஞ் செய்து
          மேனதோர் கருணை யோடும் விடைபெறீஇ விண்ணு ளோர்கள்
               சேனையந் தலைவன் கந்தச் சிலம்பினிற் கோயில் புக்கான். ......    4

(புக்கதோர் குமர)

புக்கதோர் குமர மூர்த்தி பொருதிறல் வயவர் யாருந்
     தொக்கனர் பணியில் நிற்பத் தொல்படைக் கணங்கள் போற்ற
          மைக்கருங் குவளை ஒண்கண் மடவர லோடு மேவி
               மிக்குயர் மணிப்பீ டத்தில் வீற்றிருந் தருளி னானே. ......    5

(துய்யதோர் மறைக)

துய்யதோர் மறைக ளாலுந் துதித்திடற் கரிய செவ்வேள்
     செய்யபே ரடிகள் வாழ்க*1 சேவலும் மயிலும் வாழ்க
          வெய்யசூர் மார்பு கீண்ட வேற்படை வாழ்க அன்னான்
               பொய்யில்சீ ரடியார் வாழ்க வாழ்கஇப் புவன மெல்லாம். ......    6

ஆகத் திருவிருத்தம் - 8212

*1. (பா-ம்) துய்யதா மறைகளாலுந் துதித்திட அரிய தான செவ்வேள் அடிகள் வாழ்க.