தெளிவுரை:

"['வேதம்' போன்ற நூல்களைக்] ஓதல் [கற்றல்], ஓதுவித்தல் [கற்பித்தல்],
வேட்டல் [வேள்வி, அல்லது யாகம், செய்தல்], வேட்பித்தல்
[ஏனையோரின் நன்மைக்காக வேள்வி செய்வித்தல்], ஏற்றல்
[மற்றவர்களிடமிருந்து பொருளைத் தானமாகப் பெறுதல்], ஈதல்
[மற்றவர்களுக்குப் பொருளைத் தானமாகக் கொடுத்து உதவுதல்] ஆகிய
ஆறுவகைப் பணிகளையும் தவறாமல் நிறைவேற்றுபவர்களாகவும்;
தாய்-தந்தையர் இருவரின் குடும்பமும் நல்ல குடும்பம் என
உலகத்தாரால் மதிக்கப்பெற்ற பழம்பெரும் குடியில்
தோன்றியவர்களாகவும்; தம் வாழ்நாளில் முதலாவது நாற்பத்தெட்டு
ஆண்டுகள் அடங்கிய இளமைக் காலம் முழுவதும் 'பிரமச்சரியம்'
எனப்படும் திருமணமாகாத வாழ்வியலை மேற்கொள்பவர்களாகவும்;
அறம் பொருந்திய கோட்பாட்டினை உடையவர்களாகவும்; 'ஆகவனீயம்,
தக்கிணாக்கினியம், காருகபத்தியம்' எனப்படும் மூவகைத் தீயால் வேள்வி
செய்து பெறும் செல்வத்தை உடையவர்களாகவும்; இவ்வுலகில் [தம்
தாயின் வயிற்றிலிருந்து] இயற்கையாகப் பிறக்கும் பிறப்போடு,
கல்வியறிவு, அறிவு முதிர்ச்சி ஆகியவற்றை எய்திய பிறகு 'மீண்டும்
பிறத்தலால்' 'இரு பிறப்பாளர்' என அழைக்கப்படுபவர்களாகவும்;
ஒவ்வொரு நாளுக்கும் உரிய நல்ல நேரத்தை கணித்து மற்றவர்களுக்குத்
தெரிவிப்பவர்களாகவும்; [ஒவ்வொரு புரியிலும்] மூன்று நூல்
இழைகளைத்கொண்ட புரிகள் மூன்றால் ஆகிய ஒன்பது
நூலிழைகளைக் கொண்ட பூணூலை அணிபவர்களாகவும்; நீராடிய
பின்னர் உலராத ஆடையையே அணிந்து ஈரமான அந்த ஆடை
உலரும்படிச் செய்பவர்களாகவும்; தலை உச்சி மீது தங்கள் இரு
கைகளையும் குவித்து இறைவனை வணங்குபவர்களாகவும்; 'சரவணபவ',
அல்லது 'குமாராயநம' என்னும் ஆறெழுத்து மந்திரத்தைச் சொல்லி, தம்
நாவினால் மென்மையாகவும் இனிமையாகவும் பாடி நறுமணமுடைய
மலர்களைத் தூவி திருமுருகப்பெருமானை வழிபடுபவர்களாகவும்
விளங்கும் அந்தணர்கள் வாழ்ந்துவரும் திரு ஏரகத்திலும்
திருமுருகப்பெருமான் மனமகிழ்வோடு அமர்ந்திருக்கும் உரிமை
உடையவன், அதுமட்டுமன்று ..."

அரும்பத அகராதி:

இருமூன்று எய்திய இயல்பு = 'ஓதல், ஓதுவித்தல், வேட்டல்,
        வேட்பித்தல், ஏற்றல், ஈதல்'. ஆகிய அறுவகைப் பணிகளை
        நிறைவேற்றும் பண்பு;
இருவர்ச்சுட்டிய = தாயும், தந்தையும் ஆகிய இருவரின் குலத்தின்,
        அல்லது குடும்பத்தின் நற்பெயரைப் புகழ்ந்து கூறிய;
அறு-நான்கு இரட்டி இளமை நல் யாண்டு = 6x4 + 6x4 = 48
        ஆண்டுகள் அடங்கிய இளமைக் காலம்;
முத்தீ = 'ஆகவனீயம், தக்கிணாக்கினியம், காருகபத்தியம்' என்னும்
        மூவகை வேள்வித் தீ;
இருபிறப்பாளர் = இயற்கைப் பிறப்பு, அறிவு முதிர்ச்சியின் பின்னர்
        எய்தும் மறு பிறப்பு ஆகிய இரு பிறப்புகளுக்குரிய அந்தணர்கள்;
பொழுது அறிந்து நுவல = நல்ல நேரத்தை கணித்துத் தெரிவிக்க;
ஒன்பதுகொண்ட மூன்று புரி நுண்ஞாண் = [ஒவ்வொரு புரியிலும்
        மூன்று இழைகளைக்கொண்ட] மூன்று புரிகளாலாகிய ஒன்பது
        இழைகளைக்கொண்ட பூணூல்;
புலராக் காழகம் புலர உடீஇ = உலராத ஆடையை உலரும்படி
        உடுத்தி;
உச்சிக்கூப்பிய கையினர் = தலை உச்சி மீது இரு கைகளையும்
        குவித்து வணங்குபவர்கள்;
ஆறு எழுத்து அடக்கிய அருமறைக் கேள்வி = 'சரவணபவ',
        அல்லது 'குமாராயநம' என்னும் ஆறு எழுத்துகள் அடங்கிய மந்திரம்;
'விரைவுறு நறுமலர் ஏந்தி = நறுமணம் உடைய மலர்களைத் தூவி;
பெரிது உவந்து = மிகவும் மகிழ்ந்து;
ஏரகத்து உறைதலும் உரியன் = திரு ஏரகத்தில் அமர்ந்திருக்கும்
        உரிமையுடைய திருமுருகப்பெருமான்.