பாடல் 91 ... திகிரி வலம்புரி   (இடங்குறித்தல்)

......... பாடல் .........

      திகிரி வலம்புரி மாற்கரி யார்க்குப தேசஞ்சொன்ன
      திகிரி வலம்புரி செய்யா ரிலஞ்சிசெந் தூர்கனதந்
      திகிரி வலம்புரி வேறும் படைத்தருள் சேய்தணியில்
      திகிரி வலம்புரி சூடிய வாநன்று சேடியின்றே ...... 91

......... சொற்பிரிவு .........

திகிரி வலம் புரி மாற்கு அரியார்க்கு உபதேசம் சொன்ன

திகிரி வலம்புரி செய் ஆர் இலஞ்சி செந்தூர் கனத்

(தந்) திகிரி வலம் புரிவேறும் படைத்தருள் சேய் தணியில்

திகிரி வலம்புரி சூடியவா நன்று சேடி இன்றே.

......... பதவுரை .........

திகிரி ... சக்ராயுதத்தை,

வலம் ... வலக் கையில்,

புரி ... தரித்துள்ள,

மாற்கு ... திருமாலால்,

அரியார்க்கு ... தேடி கண்டு கொள்ள முடியாத (பரமசிவனுக்கு),

உபதேசம் சொன்ன ... பிரணவப் பொருளை உபதேசித்த,

திகிரி ... சுவாமிமலைப் பதி,

வலம்புரி ... வலம்புரி சங்குகள்,

செய் ... வயல்களில்,

ஆர் ... நிறைந்திருக்கும்,

இலஞ்சி ... இலஞ்சிப் பதி,

செந்தூர் ... திருச்செந்தூர்,

கனத் தந்திகிரி ... மேகங்கள் சூழ்ந்த சர்ப்பம் போன்ற திருச்செங்கோடு,

வலம் ... திருவலம்,

புரி வேறும் ... வேறு பல தலங்களையும் சிருஷ்டித்து அருள் செய்த,

சேய் ... குமாரக் கடவுளின்,

தணியில் ... திருத்தணியில்,

திகிரி ... மூங்கில்,

வலம் புரி ... நந்தியாவட்டை மலரை,

சூடிய வா ... சூடி இருக்கும் குறிப்பு,

இன்றே நன்று ... இத்தினத்தில் நன்றாக அமைந்திருக்கிறது,

சேடி ... தோழியே.

......... பொழிப்புரை .........

திருமாலினால் அறியப்படாதவரான சிவனுக்கு பிரணவ உபதேசம் செய்த ஏரகப் பதி, சங்குகள் வயல்கள் நிறைந்துள்ள இலஞ்சிப் பதி, செந்திற் பதி, நாகாசலம், திருவலம் முதலிய பல தலங்களையும் தனது உறைவிடமாகக்கொண்ட குமாரக் கடவுளின் தணிகை மலையில் மூங்கிலின் மேல் நந்தியாவட்டை மலர் மலர்ந்திருக்கும் குறிப்பு நன்றாக அமைந்திருக்கிறது.

(தலைவி குமாரக்கடவுளின் பல தலங்களிலும் தணிகைக்கு மட்டும் சிறப்பான அடைமொழியைக் கூறி இருப்பதால் தணிகாசலனே அவளுக்கு உகந்த நாயகன் என்பதை குறிப்பாக உணர்த்தி இருக்கிறாள்).