பாடல் 68 ... சேகரவாரண வேல்   (விரக தாபம்)

......... பாடல் .........

      சேகர வாரண வேல்வீர வேடச் சிறுமிபத
      சேகர வாரண மேவும் புயாசல தீவினையின்
      சேகர வாரண வெற்பாள நாளுந் த்ரியம்பகனார்
      சேகர வாரண நின்கையில் வாரணஞ் சீவனொன்றே ...... 68

......... சொற்பிரிவு .........

சே கரவா ரண வேல்வீர வேடச்சிறுமி பத

சேகர வாரணம் மேவும் புயாசல தீவினையின்

சேகு அர ஆரண வெற்பாள நாளும் த்ரியம்பகனார்

சே கர வாரணம் நின் கையில் வாரணம் சீவன் ஒன்றே.

......... பதவுரை .........

சே ... அடியவர்களை

கரவா ... பின் வாங்குதல் இல்லாத,

ரண வேல் வீர ... போர் செய்வதில் வல்லமை உள்ள வேலாயுத மூர்த்தியே,

வேடச்சிறுமி ... வள்ளி நாயகியின்,

பத சேகர ... தாள்களை சிரத்தில் ஏந்தியவனே,

வாரண ... தேவயானை,

மேவும் ... தழுவும்,

புயாசல ... மலை போன்ற தோள்களை உடையவனே,

தீவினையின் ... (அடியார்களின்) கொடிய வினையின்,

சேகு ... வஜ்ரம் போன்ற திடத் தன்மையை,

அர ... அரம் போன்று பொடி செய்பவனே,

ஆரண வெற்பாள ... வேதங்கள் பூஜிக்கும் செங்கோட்டு மலைக்கு அதிபனே,

நாளும் ... தினந்தோரும்,

த்ரியம்பகனார் ... முக்கண்ணுடைய சிவபெருமான்,

சே ... மால் விடையாகிய திருமாலின்,

கர ... கையிலிருக்கும்,

வாரண ... பாஞ்ச சன்யம் என்ற சங்கிற்கும்,

நின் கையில் ... உன் கையில் இருக்கும்,

வாரணம் ... கொடியாகிய கோழிக்கும்,

சிவன் ஒன்றே ... (உன்னைச் சேர்ந்திருக்கும் இரவு காலம் நீடிக்காமல் பொழுது புலர்வதை தொனி செய்து காட்டும் சங்கும், அதே போல் சேவல் காலைப் பொழுதை வரவழைக்க கூவுவதாலும்) இரண்டிற்கும் உயிர் ஒன்றாக இருக்குமோ?

......... பொழிப்புரை .........

அடியார்களை காப்பதையே நியமமாகக்கொண்ட வேல் ஏந்தி இருக்கும் வீரனே, வள்ளி நாயகியின் தாசனே, வேதங்கள் தொழும் செங்கோட்டு வேலவனே, இரவை நீட்டிக்காமல் காலைப் புலர்வதை காண்பிப்பதில் சங்கிற்கும் உன்னுடைய சேவலுக்கும் பிராணம் (உயிர்), ஒன்றாக இருக்குமோ?