பாடல் 66 ... சீகர சிந்துர   (மயிலால் வினைக்குன்றை பொடிசெய்)

......... பாடல் .........

      சீகர சிந்துர வுத்தவெஞ் சூர செயபுயவ
      சீகர சிந்துர வல்லிசிங் கார சிவசுதசு
      சீகர சிந்துர கந்தர வாகன் சிறைவிடுஞ்சு
      சீகர சிந்துர மால்வினைக் குன்றைச் சிகண்டிகொண்டே ...... 66

......... சொற்பிரிவு .........

சீகரம் சிந்து ரவுத்த வெஞ்சூர செய புய

(வ) சீகர சிந்துர வல்லி சிங்கார சிவசுத

(சு) சீ கர சிந்துர கந்தர வாகன் சிறைவிடும்

(சு) சீகர சிந்து உர மால் வினை குன்றை சிகண்டி கொண்டே.

......... பதவுரை .........

சிகரம் ... அலைவீசும்,

சிந்து ... கடலின் கண்,

ரவுத்த ... பெரிய போர் வீரனான,

வெம் ... கொடிய,

சூர ... சூரபத்மனை,

செய ... ஜெயித்தவனே,

புய ... தோள்களை,

வசீகர ... விரும்பி அணைப்பதில் பிரியமுள்ளவளும்,

சிந்தூர ... நெற்றியில் திலகம் தீட்டியவளுமான,

வல்லி ... கொடி போன்ற வள்ளிநாயகிக்கு உரிய,

சிங்கார ... அலங்காரமுடையவனே,

சிவசுத ... சிவகுமாரனே,

சுசி ... பரிசுத்தமான அக்கினியால்,

கர ... பொறி ரூபத்தில் ஏந்தப் பட்டவனே,

சிந்தூர ... ஐராவதத்தையும்,

கந்தர ... மேகத்தையும்,

வாகன் ... வாகனமாக உடைய இந்திரனின்,

சிறையை விடும் ... சிறையை மீட்டுக் கொடுத்த,

சுசீகர ... பரிசுத்த மூத்தியே,

உர ... வலிய,

மால் ... மயக்கத்தைத் தரும்,

வினைக் குன்றை ... இருவினைகளாகிய மலையை,

சிகண்டி கொண்டே ... மயில் வாகனத்தில் எழுந்தருளி,

சிந்து ... சிதற அடித்து விடு.

......... பொழிப்புரை .........

சமுத்திரத்தில் சூரனை சங்கரித்தவனே, அழகிய தோள்களை உடையவனே, சிவ மைந்தனே, வள்ளி மணாளனே, அக்கினியின் கையில் இருந்தவனே, இந்திரனின் சிறையைக் களைந்த பரிசுத்தனே, நீ மயிலேறி வந்து என்னுடைய பூர்வ வினையாகிய குன்றை பொடி செய்ய வேண்டும்.

(சிகண்டி கொண்டே என்ற சொற்டொடருக்கு வேறு ஒரு பொருளும் காணலாம். மயில் மேரு முதலிய மலைகளை தகர்க்க வல்லது என்பதை மயில் விருத்தத்தில் காணலாம். ஆதலால் வேல் எப்படி வினைகளைக் களையுமோ அது போல உன் மயில் வாகனத்தைக் கொண்டு என் வினைகளை பொடியாக்கி விட வேண்டும் என்பதே பொருள்).