பாடல் 65 ... திகைப்படங்க   (அகத்துறை)

......... பாடல் .........

      திகைப்படங் கப்புயந் தந்தரு ளானென் படிங்கணிய
      திகைப்படங் கத்தமை யார்செந்தி லாரென்ப டென்னனுய
      திகைப்படங் கப்புகல் சேயென்பள் கன்னிகண் ணீர்தரவி
      திகைப்படங் கத்தமை யாதெமை யாட்கொளுஞ்சீகரமே ...... 65

......... சொற்பிரிவு .........

திகைப்பள் தங்க புயம் தந்தருளான் என்பள் திங்கள்

(நிய) தி கைப்பள் தம் கத்து அமையார் செந்திலார் என்பள் தென்னன்

(உய) தி கைப்பு அடங்க புகல் சேய் என்பள் கன்னி கண்ணீர் தர

(வி) தி கைபடு அங்கத்து அமையாது எம் ஐ ஆட்கொளும் சீகரமே.

......... பதவுரை .........

கன்னி ... என் உயிர் போன்ற இந்தப் பெண்,

கண்ணீர் தர ... விழிகளில் நீர் சொரிந்து கொண்டு,

திகைப்பள் ... மயங்கி நிற்கிறாள்,

செந்திலார் ... செந்திலாண்டவன்,

புயம் ... தன்னுடைய திருத்தோள்களை,

அருளான் என்பள் ... எனக்குக் கொடுத்து அருள மாட்டார் என்கிறாள்,

திங்கள் ... சந்திரனை,

நியதி ... தினமும்,

கைப்பள் ... வெறுத்து பேசுகிறாள்,

தம் கத்து ... தான் இப்படி அரற்றி வருந்துவதைப் பார்த்து,

அமையார் என்பள் ... மன்னித்து ரட்சிக்க மாட்டேன் என்கிறார் என்று சொல்லுகிறாள்,

தென்னன் ... பாண்டிய மன்னனின்,

உய்தி ... சுர வருத்தத்தின்,

கைப்பு அடங்க ... கொடுமை நீங்க,

புகல் ... தேவாரப் பதிகத்தைப் பாடி அருளிய,

சேய் என்பள் ... சம்பந்தப் பிள்ளை என்று கூறுகிறாள் (ஆதலால்),

விதி ... பிரமனின்,

கைப்படு ... கையினால் சிருஷ்டிக்கப்படுகின்ற

அங்கத்து ... உடலுக்குள்,

அமையாது ... இந்த ஆன்மா சேர்க்கபட்டு மீண்டும் பிறவி அடையாதபடி,

ஆட்கொளும் ... ஆண்டு கொள்ள வேண்டும்,

எம் ஐ ... என்னுடைய சுவாமியே

சீகரமே ... அழகிய குமாரக்கடவுளே.

......... பொழிப்புரை .........

அழகிய குமாரக் கடவுளே, என் உயிர்ப் பெண்ணானவள் செந்திலாண்டவன் என் குறைகளைக் தணிக்கிறானில்லை என்றும், அவன் புயத்தைத் தழுவத் தருகிறானில்லை என்றும் பாண்டியனின் சுரத்தை தணித்தருளிய ஞானசம்பந்தரே என்றும் சொல்லுகிறாள். இனி இப்படிப்பட்ட பிறவி உற்று வருந்தாத வண்ணம் ஆண்டு கொள்ள வேண்டும்.