பாடல் 56 ... தென்ன வனங்கன   (தலைவனின் மாலை கேட்டல்)

......... பாடல் .........

      தென்ன வனங்கனஞ் சூழ்காத் திரிநக சூலகரத்
      தென்ன வனங்கனந் தப்பத நீட்டினன் செல்வமுன்பின்
      தென்ன வனங்கனன் னீற்றாற் றிருத்திய தென்னவின்னந்
      தென்ன வனங்கனங் கைச்சிலைக் கூனையுந் தீர்த்தருளே ...... 56

......... சொற்பிரிவு .........

தென்ன வனம் கனம் சூழ் கா திரிநக சூலகர

தென்னவ அங்க னந்த பத நீட்டினன் செல்வன் முன்பின்

தென்னவன் அங்கம் நன்னீற்றால் திருத்திய தென்னை இன்னம்

தென்ன அனங்கன் அம் கை சிலை கூனையும் தீர்த்து அருளே.

......... பதவுரை .........

தென்ன வனம் ... தென்னஞ் சோலைகளும்,

கனம் ... மேகங்கள்,

சூழ் ... கவிந்து கொண்டிருக்கும்,

திரி நக ... திருத்தணி, பரங்குன்றம், திருச்செங்கோடு என்னும் மூன்று மலைகளுக்கு அதிபனே,

சூல கர ... கையில் சூலத்தைப் பிடித்திருக்கும்,

தென்னவ ... தென் திசைக்கு அதிபனாகிய எமராஜனின்,

அங்க ... உடல்,

னந்த ... அழியும்படி,

பத நீட்டினன் ... காலால் நீட்டி உதைத்த பரமசிவனின்,

செல்வ ... குமாரனே,

முன் ... முன்னொரு காலத்தில்,

பின் ... பின் முதுகில் கூனுடைய,

தென்னவன் ... பாண்டியனின்

அங்க ... உடல் கூனை,

நன்னீற்றால் ... நன்மையே பயக்கும் விபூதியினால்,

திருத்திய தென்ன ... சரி செய்து நிமிர்த்தியது போல,

இன்னம் ... இப்போது,

தென்ன ... வனப்புடைய,

அனங்கன் ... மன்மதனின்,

அம் ... அழகிய,

கை சிலை ... கையில் பிடித்த கரும்பு வில்லின்,

கூனையும் ... வளைவையும்,

தீர்த்து ... நீக்கி,

அருளே ... அந்த மன்மதன் என்மேல் பாணத்தை எய்தாதபடி நீ அணிந்திருக்கும் மாலையை தந்தருள வேண்டும்.

......... பொழிப்புரை .........

திருத்தணி, பரங்குன்று, திருச்செங்கோடு என்கிற மலைகளுக்கு அதிபனே, காலாந்தகனாகிய சிவனின் மைந்தனே, முன்பு சம்பந்தப்பிள்ளையாய் பாண்டியனின் கூனை நிமிர்த்தியது போல மன்மதனின் வில்லின் வளைதலையும் நீக்க வேண்டும்.

(முன்பின் என்கிற சொல்லுக்கு வேறு ஒரு நல்ல பொருளும் இருக்கிறது. பாண்டியனுக்கு முன்மார்பிலும் பின்முதுகிலும் கூன்கள் இருந்தன என்பது தக்க யாக பரணியில் சொல்லப்பட்டுள்ளது. ஆதலால் முன்பின் என்னும் சொற்சொடருக்கு முன்னும் பின்னும் இருந்த இரண்டு கூன்கள் என்றும் பொருள் கொள்ளலாம்).