பாடல் 55 ... தீதோ மரணந்த   (முருகனைத் துதிக்க புத்திக்கு உபதேசம்)

......... பாடல் .........

      தீதோ மரணந் தவிரும் பிறப்பறுந் தீயகற்புந்
      தீதோ மரணம் பரமீது தானவர் சேனை முற்றுந்
      தீதோ மரணந் தனபூசு ரர்திரண் டேத்தியமுத்
      தீதோ மரண மலையாளி யென்றுரை தென்னுறவே ...... 55

......... சொற்பிரிவு .........

தீதோ மரணம் தவிரும் பிறப்பு அறும் தீய கல்

(புந்) தீ தோம் அரண் அம்பர மீது தானவர் சேனை முற்றும்

தீ தோமர ணந்தன பூசுரர் திரண்டு ஏத்திய

(முத்) து ஈது ஓம ரண மலையாளி என்று உரை தென்னுறவே.

......... பதவுரை .........

தீயகல் புந்தீ ... கொடியனவற்றையே கற்கின்ற ஏ மனமே,

தீதோ ... தீமை மாத்திரமோ

மரணம் தவிரும் ... இறப்பும் ஒழிந்து போகும்,

பிறப்பு அறும் ... பிறவியும் நீங்கும் (ஆதலால்),

தோம் ... குற்றத்திற்கு,

அரண் ... இடம் ஆகிய,

அம்பர மீது ... கடலின் கண்,

தானவர் சேனை முற்றும் ... அசுர சேனை அனைத்தையும்,

தீ ... தகித்த,

தோமர ... கை வேலை உடையவனே,

ணந்தன ... கருணா மூர்த்தியே,

பூசுரர் திரண்டு ஏத்திய ... வேள்வி முடியும் காலத்தில் வேதியர்கள் எல்லோரும் திரண்டு கொண்டு ஒரே மாதிரியாகிய உச்ச குரலில் சுப்ரமண்யோம் என்கிற மந்திரத்தை முழக்கி வணங்குகின்ற,

முத்து ... முத்துக்குமரனே,

ஈது ... இந்த,

ஓம ... வேள்வியில் கொடுக்கப்படும் அவிர் பாகத்திற்கு,

ரண ... உரிமையை உடையவனே,

மலையாளி ... குறிஞ்சிக் கடவுளே,

என்று உரை ... என்று துதிப்பாயாக,

தென்னுறவே ... உன் சித்தம் அழகு பெறவே.

......... பொழிப்புரை .........

தீமையே கருதும் புத்தியே கடலின் கண் அசுரர் சேனையை அழித்த வேலாயுதனே, வேதியர்கள் யாகத்தில் துதித்து கொடுக்கும் அவிர் பாகத்தை ஏற்பவனே, சரவண முத்தையனே, குறிஞ்சிக்கடவுளே என்று துதித்தால் உன்னுடைய தீமை அழிவது மாத்திரமா? இறவாத பிறவாத நிலையும் வாய்க்கும்.