பாடல் 39 ... தீவர கந்தரி   (முருகன் திருவடியே உறவு)

......... பாடல் .........

      தீவர கந்தரி தாம்பகி ராருற வானசெம்பொன்
      தீவர கந்தரி யாநொந்த போதினிற் செச்சையவிந்
      தீவர கந்தரி சிந்துரை பாக சிவகரண
      தீவர கந்த ரிபுதீ ருனதடி சேமநட்பே ...... 39

......... சொற்பிரிவு .........

தீ வரகு அந்து அரி தாம்பகிரார் உறவான செம்பொன்

தீவர் அகம் தரியா நொந்தபோதினில் செச்சைய,

(இந்) தீவர, கந்தரி சிந்துரை பாக, சிவகரண

தீ வர கந்த, ரிபு தீர் உன் அடி சேம நட்பே.

......... பதவுரை .........

அகம் ... வறுமையாகிய பாவத்தை,

தரியா ... ஏற்றுக் கொண்டு,

நொந்தபோதினில் ... மனது உடைந்து வேதனைப் படும்போது,

உறவான செம்பொன் தீவர் ... உறவினர் என்று சொல்லப்படும் பெரிய ஐஸ்வரியவான்கள்,

தீ ... தீந்து போன,

அந்து அரி ... அந்துப்பூச்சியால் அரிக்கப்பட்ட,

வரகு ... கேழ்வரகு தானியத்தைக் கூட,

தாம்பகிரார் ... தானம் கொடுக்க இசைய மாட்டார்கள் (ஆதலால்),

செச்சைய இந்தீவர ... வெட்சி மாலையும் நீலோற்பல மாலைையும் புனைந்தவனே,

கந்தரி ... குகையில் வாழும் வள்ளியம்மையையும்,

சிந்துரை ... யானையால் வளர்க்கப்பட்ட தேவசேனையையும்,

பாக ... இருபக்கங்களிலும் வைத்திருப்பவனே,

சிவ கரண ... சிவ தியானம் செய்யும்,

தீ ... புத்தியை,

வர ... வரமாக அளிக்கும்,

கந்த ... கந்தப் பெருமாளே

ரிபு தீர் உனது அடி ... எதிரிகளை அழிக்கும் உனது திருவடிகளே,

சேம நட்பே ... பொக்கிஷமும் உறவுமாகும்.

......... பொழிப்புரை .........

வள்ளி தேவசேனை பாகனே, அடியார்களுக்கு சிவ தியான அறிவை அனுக்கிரகம் செய்பவனே, என்னுடைய உறவினர்கள் பொன் விளையும் தீவில் வசிப்பவர்கள் ஆனாலும் நான் வறுமையால் வேதனைப்படும் பொழுது அந்து அரித்து தீந்து போன வரகையாவது கொடுப்பார்களா? ஆகையால் உன்னுடைய திருவடிகளே எல்லா செல்வமும் உறவும் ஆகும்.