பாடல் 13 ... தேங்கா வனமும்   (இடமணித் தென்றல்)

......... பாடல் .........

      தேங்கா வனமும் மதகரி வேந்துடன் சேர்ந்த விண்ணோர்
      தேங்கா வனமுனை யவ்வேற் பணியெனுஞ் சேயிடமேல்
      தேங்கா வனமுந் தளர்நடை யாயஞ்சல் செண்பகப்பூந்
      தேங்கா வனமுங் கழுநீ ரிலஞ்சியுஞ் செந்திலுமே ...... 13

......... சொற்பிரிவு .........

தேங்கு ஆவன மும்மதகரி வேந்துடன் சேர்ந்த விண்ணோர்

தேம் காவல் நம் முனைய வேல் பணி எனும் சேய் இடம் மேல்

தேங்கா அனமும் தளர் நடையாய் அஞ்சல் செண்பக பூம்

தேங்கா வனமும் கழுநீர் இலஞ்சியும் செந்திலுமே.

......... பதவுரை .........

தேங்கு ... நிறைந்திருக்கும்,

ஆவன ... பசுக் கூட்டங்களை மேய்க்கும் திருமாலையும்,

மும்மதகரி ... மும்மதங்களையும் பொழியும் ஐராவதத்திற்கு தலைவனான,

வேந்துடன் ... இந்திரனையும்,

சேர்ந்த ... அவருடன் சேர்ந்திருக்கும்,

விண்ணோர் ... தேவர்களையும்,

தேம் ... அவர்களுக்கு இருப்பிடமான அமராவதியையும்,

காவல் ... ரட்சிப்பது,

நம் ... நம்முடைய,

முனைய வேல் ... கூரிய வேலாயுதத்தின்,

பணி ... தொழிலாகும்,

எனும் ... என்று சொல்லி (அதைக் கட்டளை இட்ட)

சேய் ... முருகனின்,

இடம் ... வாசஸ்தலம்,

மேல் ... இதோ இருக்கிறது,

தேங்கா ... திகைத்து,

அனமும் ... தன் நடையை தோற்கடிக்கிறது என்று அன்னப் பட்சியும்,

தளர் ... தளர்ந்து போகும்,

நடையாய் ... நடையை உடையவளே,

அஞ்சல் ... பயப்படாதே (அவை யாவன),

செண்பக ... செண்பக மலரால்,

பூம் ... விளங்கும்,

தேம் ... இனிய,

காவனமும் ... பூஞ்சோலையும்,

கழுநீர் இலஞ்சியும் ... செங்கழுநீர் தடாகமும்,

செந்திலும் ... திருச்செந்தூர் தலமுமேயாகும்.

......... பொழிப்புரை .........

அன்னமும் தோற்கும் நடையை உடைய பெண்ணே, அஞ்சாதே, விண்ணோர்களை காத்து வருவாய் என்று வேலாயுதத்திற்கு கட்டளை இட்ட குமரக் கடவுளின் இருப்பிடமாகிய திருச்செந்தூரும், இனிய பூங்காவும், கழுநீர் மடுவும் இதோ வந்து விட்டன.