பாடல் 41 ... தெண்டன் புர   (எம வேதனையை நீக்க)

......... பாடல் .........

      தெண்டன் புரந்தர வக்குன்றில் வாழ்கந்த சிந்துவிலுத்
      தெண்டன் புரந்தர லோகஞ் செறாதுசெற் றோய்களைவாய்
      தெண்டன் புரந்தர நற்கேள் சிறுவ ரழச்செய்தெம்மைத்
      தெண்டன் புரந்தர வின்படி நூக்கிய தீநரகே ...... 41

......... சொற்பிரிவு .........

தெண்டன் புரந்து அரவக்குன்றில் வாழ்கந்த சிந்துவில்

(உத்) தெண்டன் புரந்தரலோகம் செறாது செற்றோய், களைவாய்

தெண்டன் புரந்தர் அம் நற்கேள் சிறுவர் அழச்செய்து எம்மை

தெள் தன் புரம் தரவின்படி நூக்கிய தீ நரகே.

......... பதவுரை .........

தெண்டன் ... வணங்குகிறேன்,

அரவக் குன்றில் வாழ் கந்த ... நாகாசல வேலவனே,

சிந்து வில் ... சமுத்திரத்தின் கண்,

உத்தெண்டன் ... மகாபலசாலியான சூரபத்மன்,

புரந்தர லோகம் ... இந்திர லோகத்தை,

செறாது ... அழிக்காதபடி,

செற்றோய் ... அவனை வதைத்தவனே,

(புரந்து ... என்னைக் குறைவரக் காப்பாற்றி)

தெண்டன் ... தண்டாயுதத்தை உடைய எமன்,

புரந்தர் ... தொன்று தொட்டு வந்து,

அம் நற் கேள் ... அழகிய நல்ல சுற்றத்தாரும்,

சிறுவர் ... பிள்ளைகளும்,

அழச்செய்து ... என் உடலைச் சுற்றி உட்கார்ந்து கொண்டு அழச்செய்து,

எம்மை ... எம் உயிரைப் பிரித்து,

தெள் ... தெள்ளிய தன்மையை உடைய,

தன் புரம் ... தன் ஊராகிய எமபுரிக்கு கூட்டிச் சென்று,

தரவின் படி ... தனது உத்தரவின்படி,

நூக்கிய ... சென்று நுழைக்கும்,

தீ நரகே ... நரகாக்கினியைக்

(களைவாய் ... நீக்குவாய்)

......... பொழிப்புரை .........

செங்கோட்டு வேலவனே, இந்திர லோகம் அழியாதபடி சூரனைச் ஜெயித்தவனே, உன்னைத் தாழ்ந்து வணங்குகிறேன். என் சுற்றத்தாரும் பிள்ளைகளும் சூழ்ந்து கொண்டு அழும்படி எமன் என் உயிரைப் பிரித்து தன் லோகத்திற்கு கொண்டு போய் நரகாக்கினியில் தள்ளாமல் என்னைக் காத்தருள வேண்டும்.