பாடல் 36 ... செச்சைய வாவி   (முருகன் திருவடியில் சேர)

......... பாடல் .........

      செச்சைய வாவி கலயில்வல்வாயிடைச் சேடனிற்கச்
      செச்சைய வாவி பருகுஞ் சிகாவல செங்கைவெந்தீ
      செச்சைய வாவி விடுகெனுஞ் செல்வநின் றாளணுகச்
      செச்சைய வாவி னுயிர்வாழ் வினியலஞ் சீர்ப்பினுமே ...... 36

......... சொற்பிரிவு .........

செச்சைய, வாவு இகல் அயில் வல் வாயிடை சேடன் நிற்க

செ சைய ஆவி பருகும் சிகாவல, செம் கை வெம் தீ

செச்சைய வாவி விடுக எனும் செல்வ, நின் தாள் அணுக

செ சை அவாவின் உயிர் வாழ்வு இனி அலம் சீர்ப்பினுமே.

......... பதவுரை .........

செச்சைய ... வெட்சி மாலை தரித்திருப்பவனே,

வாவு ... தாவிப் பாய்கின்றதும்,

இகல் ... சர்ப்பங்களிடத்தில் பகையும்,

அயில் ... கூர்மை பொருந்திய,

வல் ... வலிய,

வாயிடை ... வாயினிடத்தில்,

சேடன் நிற்க ... பாம்பை வைத்துக் கொண்டு,

செ ... சிவந்த,

செய்ய ... மலையின் கண்,

ஆவி பருகும் ... அதனுடைய உயிரை உண்ணுகின்ற,

சிகாவல ... மயிலை வாகனமாக உடையவனே,

செம் கை ... (பரமசிவன் அக்னியைப் பார்த்து) உன்னுடைய சிவந்த கரத்தில்,

வெம் தீ ... இந்த வெப்பமான அக்னிப் பொறியை ஏந்திக் கொண்டு,

செச்சைய ... ஆட்டு வாகனத்தையுடைய அக்கினித் தெய்வமே,

வாவி விடுக ... சரவண தடாகத்தில் கொண்டு போய் விடு,

எனும் ... என்று சொல்ல (அங்கு உற்பவித்த),

செல்வ ... பாலகனே,

நின் தாள் அணுக ... உன்னுடைய திருவடிகளை நாங்கள் அடையும்படி,

சே ... செய்வாயாக

சை ... இகழ்ச்சிக்கு இடமான,

அவாவின் உயிர் வாழவு ... ஐம்புல ஆசையுடன் சேர்ந்த இந்த ஜீவ வாழ்க்கை,

இனி அலம் ... இனி மேல் நமக்கு வேண்டாம்,

சீர்ப்பினும் ... செல்வம் அதிகரித்தாலும்

(இனி அலம்)

......... பொழிப்புரை .........

வெட்சி மாலையை தரித்திருப்பவனே, சர்ப்பத்தை உண்ணும் மயில் வாகனனே, சிவபெருமானால் அளிக்கப்பட்ட அக்னி சரவணப் பொய்கையில் விடப்பட்ட உடன் அங்கு உதித்த குமாரக் கடவுளே, இனி நாங்கள் அதிக செல்வம் அடைந்தாலும் ஆசையில் அழுந்தி இந்த உடலை வளர்க்க மாட்டோம். உன்னுடைய திருவடியில் எங்களை சேர்த்துக்கொள்.