பாடல் 86 ... சேறலைத் தாறலை   (இல்லறச் சேற்றில் எனனை உகள விடாதே)

......... பாடல் .........

      சேறலைத் தாறலைக் கப்பா லெழுந்து செழுங்கமுகிற்
      சேறலைத் தாறலைக் குஞ்செந்தி லாய்சிந்தை தீநெறியிற்
      சேறலைத் தாறலைத் தீர்க்குங் குமார திரியவினைச்
      சேறலைத் தாறலைக் கத்தகு மோமெய்த் திறங்கண்டுமே ...... 86

......... சொற்பிரிவு .........

சேறு அலைந்து ஆறு அலைக்கு அப்பாலெழுந்து செழுங்கமுகில்

சேறு தலை தாறு அலைக்கும் செந்திலாய், சிந்தை தீ நெறியில்

சேறலை தாறு அலை தீர்க்கும் குமார, திரிய வினை

சேறு அலைந்து ஆறலைக்கத் தகுமோ? மெய்த்திறம் கண்டுமே.

......... பதவுரை .........

சேறு ... சேற்றை,

அலைத்து ... உழக்கி,

ஆறு அலைக்கு ... ஆற்றின் அலையில்,

அப்பால் எழுந்து ... மேலே எழுந்து,

செழும் ... வளப்பமான,

கமுகில் ... பாக்கு மரத்தில்,

சேல் ... சேல் மீன்கள்,

தலை ... மரத்தின் உச்சியில் இருக்கும்,

தாறு ... குலைகளை,

அலைக்கும் ... மோதித் தாக்கும்,

செந்திலாய் ... செந்திற் பதியோனே,

சிந்தை ... என் சித்தமானது,

தீ நெறியில் ... கெட்ட மார்க்கத்தில்,

சேறலை ... போய்ச் சேருவதையும்,

தாறு அலை ... அளவில்லாத அஞ்ஞான இருளை அடைவதையும்,

தீர்க்கும் குமார ... நீக்குகின்ற குமாரக்கடவுளே,

திரிய ... மாறுபடும்படி,

வினைச்சேறு ... இருவினைகளால் ஏற்படும் பிரபஞ்சச் சேற்றில்,

அலைந்து ... என்னை உழல வைத்து,

ஆறலைக்கத் தகுமோ? ... வழிப்பறி செய்பவர் போல் என் உயிரைப் போக்கிவிடத் தகுமோ?

மெய்த்திறம் கண்டுமே ... உன்னுடைய அருட் பிரகாசத்தின் உண்மைத் திறனை உணர்ந்து அதுவே பற்றுக் கோடாகக் கருதி இருக்கும் என்னை

(ஆறலைக்கத் தகுமோ?).

......... பொழிப்புரை .........

செந்திலாண்டவனே, என் மனம் அவ நெறியில் சென்று அஞ்ஞான இருளில் முழ்குவதை தவிர்த்தாளும் குமாரக் கடவுளே, உன் அருளின் வலிமையை உணர்ந்து அதையே பற்றுக் கோடாக கருதி இருக்கும் என்னை இல்லறச் சேற்றில் மூழ்க விடுவது உன் கருணைக்கு ஏற்ற செயல் அன்று.