பாடல் 73 ... திசாமுக வேதனை   (பழமுதிர்ச்சோலையின் பேருமை)

......... பாடல் .........

      திசாமுக வேதனை யன்பாற் கரன்றிங் கடங்களவ
      திசாமுக வேதனை யீறிலு மீறிலர் சீறுமம்போ
      திசாமுக வேதனை வென்கண்ட வேலன் றினைப்புனத்தந்
      திசாமுக வேதனை நண்ணுதண் கார்வரை சேர்பவரே ...... 73

......... சொற்பிரிவு .........

திசாமுக வேதன் ஐயன் பாற்கரன் திங்கள் தங்கள்

(அவதி) சாம் உக வேதனை ஈறிலும் ஈறிலர். சீறும்

(அம்போ) தி சாமுக வேதனை வென் கண்ட வேலன் தினைப்புன

(தந்) தி சாமுக வேய் தனை நண்ணு தண் கார் வரை சேர்பவரே.

......... பதவுரை .........

திசாமுக ... நான்கு திசைகளிலும் முகத்தையுடைய,

வேதன் ... வேதத் தலைவனாகிய பிரம்மனும்,

ஐயன் ... அவரது தந்தையாகிய திருமாலும்,

பாற்கரன் (பாஸ்கரன்) ... சூரியனும்,

திங்கள் ... சந்திரனும்,

தங்கள் ... தங்கள் தங்கள்,

அவதி ... ஆயுள் முடிந்து,

சாம் ... இறந்து போகும்,

உக வேதனை ஈறிலும் ... யுகத்தில் துன்பமடையும் காலத்திலும்,

ஈறிலர் ... அழிய மாட்டார்கள்,

சீறும் ... கோபித்து ஆரவாரம் செய்கின்ற,

அம்போதி ... கடலின் கண் தோன்றி,

சாமுக ... அழிவைக் காட்டும் முகத்தை உடையவனும்,

வேதனை ... தேவர்களுக்கு அழிவில்லா துன்பத்தை விளைவித்தவனுமான சூரனை,

வென் கண்ட ... ஜெயித்து அழித்த,

வேலன் ... வேலாயுதத்தை உடைய முருகன் வசிக்கும்,

தினைப்புன ... தினைக் காடுகளையும்,

தந்தி ... யானைகளின்,

சமுக ... கூட்டங்களையும்,

நண்ணு ... தன்னுடன் பொருந்தி இருக்கும்,

தண் ... குளிர்ந்த,

கார் வரை ... மேகங்கள் தவழ்கின்ற பழமுதிர் சோலை மலையை,

சேர்பவர் ... அடைந்து இடைவிடாது தியானிப்பவர்களே.

(ஈறிலர் ... அழிய மாட்டார்கள்).

......... பொழிப்புரை .........

சமுத்திரத்தில் சூரனை வென்ற வேலாயுதப் பெருமான் நீங்காமல் உறைகின்ற சோலை மலையை தியானிப்பவர்கள், தேவர்கள் எல்லாம் அழிந்து போகும் யுக முடிவிலும் நித்ய சூரிகளாய் இருப்பார்கள்.