பாடல் 47 ... திடம்படு கத்து   (நித்யத்வம் பெற)

......... பாடல் .........

      திடம்படு கத்துங் கெடீர்கன்ம லோகச் சிலுகுமச்சோ
      திடம்படு கத்துந் திரித்தம்பு வாலி யுரத்தும்பத்துத்
      திடம்படு கத்துந் தெறித்தான் மருக திருகுமும்ம
      திடம்படு கத்துங் கநகங் குனித்தவன் சேயெனுமே ...... 47

......... சொற்பிரிவு .........

திடம் படு உகத்தும் கெடீர் கன்ம லோக சிலுகும்

(அச்சோ) திடம் படுகத்தும் திரித்து அம்பு வாலி உரத்தும் பத்து

திடம்படு கத்தும் தெறித்தான் மருக திருகு மும்மதில்

தம்படு உக துங்க நகம் குனித்தவன் சேய் எனுமே.

......... பதவுரை .........

திடம்படு ... உறுதிநிலை அழியும்,

உகத்தும் ... யுகாந்த காலத்திலும்,

கெடீர் ... அழிவில்லாமல் இருப்பீர்கள்,

கன்ம ... பூர்வ வினையால் நமக்கு ஏற்படும்,

லோக சிலுகும் ... இவ்வுலகத்தில் நமக்கு ஏற்படும் ஈஷனாத்ரயங்களையும் (மண், பெண், பொன்),

அச்சோதிடம் ... ஓயாமல் சோதிட நூல்களை பார்த்து,

படுகத்தும் ... சதா பிதற்றுவதையும்,

திரித்து ... மாற்றி,

அம்பு ... தன்பாணங்களை,

வாலி உரத்தும் ... வாலியின் மார்பின் மீதும்,

பத்து திடம்படு கத்தும் ... இராவணனுடைய உறுதியான பத்து தலைகளின் மீதும்,

தெறித்தான் ... பிரயோகித்த ஸ்ரீராமனின்,

மருக ... மருமகனே,

திருகு ... பகை கொண்ட,

மும்மதில் ... முப்புரங்களையும்,

தம்படு ... தான் தோன்றிய இடத்திலேயே,

உக ... விழுந்து அழியும்படி,

துங்க நகம் ... உயர்ந்த மேருமலையை,

குனித்தவன் ... வளைத்த சிவபெருமானின்,

சேய் ... மைந்தனே,

எனுமே ... என்று துதியுங்கள்.

......... பொழிப்புரை .........

எல்லாரும் அழியும் கடை காலத்திலும் அழியாமல் இருக்க வேண்டும் என்றால் ஜோதிட நூல்களை பிதற்றுவதை விட்டு வாலியையும் இராவணனையும் சம்காரம் செய்த ஸ்ரீ ராமபிரானின் மருமகனே முப்புரங்களையும் க்ஷணத்தில் அழித்த சிவனின் குமாரனே என்று போற்றி வணங்குங்கள்.