பாடல் 45 ... தேசம் புகல   (தலைவியின் துயரைத் தலைவன் அறிந்திலன்)

......... பாடல் .........

      தேசம் புகல வயிலே யெனச்சிறை புக்கொருகந்
      தேசம் புகல வணவாரி செற்றவ னீசற்குப
      தேசம் புகல திகவாச கன்சிறி தோர்கிலன்மாந்
      தேசம் புகல கமுதவி மானைச் செருச் செய்வதே ...... 45

......... சொற்பிரிவு .........

தேசம் புகல அயிலே என சிறை புக்கு ஒருகம்

தே சம்பு கல வண வாரி செற்றவன் ஈசர்க்கு

(உப) தேசம் புகல் அதிக வாசகன் சிறிது ஓர்கிலன்

(மா) தேசு அம்பு கலகம் உதவி மானை செரு செய்வதே.

......... பதவுரை .........

ஒரு கம் ... ஐந்து தலையில் ஒரு தலையை,

தே ... இழந்த,

சம்பு ... பிரம்மன்,

தேசம் ... எனக்கு உறைவிடமும்,

புகல ... அடைக்கல ஸ்தானமும்,

அயிலே என ... வேலாயுதமே என்று முறையிட,

சிறை புக்கு ... சிறையிற்பட்டு,

கல ... மரக்கலங்களும்

வண ... அழகும் நிறைந்த,

வாரி செற்றவன் ... உக்கிர குமார பாண்டியனாக வருணன் ஏவிய கடலை வற்றச் செய்தவனும்,

ஈசர்க்கு ... பரமசிவனுக்கு,

உபதேசம் புகல் ... பிரணவ உபதேசம் செய்த,

அதிக வாசகன் ... சிறந்த மொழியை உடைய கந்தக் கடவுள்,

சிறிது ஓர்கிலன் ... கொஞ்சங்கூட அறிந்தானில்லை,

மா தேசு அம்பு ... பிரகாசம் பொருந்திய மாம் பூவாகிய அம்பு,

கலகம் உதவி ... காமக் கலக்கத்தை ஏற்படுத்தி,

மானை ... மான் போன்ற தலைவியுடன்,

செரு செய்வதே ... போர் புரிகின்றதை,

(சிறிது ஓர்கிலன்)

......... பொழிப்புரை .........

ஒருதலை பின்னப்பட்டவனான பிரம்மன் சிறையில் அடைக்கப்பட்டு வேலாயுதமே எனக்கு சரணாகதி என்று சொல்லச் செய்தவரும், சிவனார் மனம் குளிர உபதேசம் செய்தவருமாகிய முருகப் பெருமான், மன்மதனுடைய மாம்பூ வாளி இந்த பெண்ணின் மேல் தைத்து போர்புரிவதை தெரிந்து கொள்ளவில்லை.