பாடல் 23 ... தினகர ரக்கர

(வேலாயுதத்தின் பெருமை)

......... பாடல் .........

      தினகர ரக்கர தங்கெடுத் தார்குரு தேசிகர்செந்
      தினகர ரக்கர மாறுடை யார்தெய்வ வாரணத்தந்
      தினகர ரக்கர சத்தியின் றாகிலத் தேவர்நண்ப
      தினகர ரக்கர தந்தீர்வ ரீர்வர் செகமெங்குமே ...... 23

......... சொற்பிரிவு .........

தினகரர் அக்க ரதம் கெடுத்தார் குரு தேசிகர்

(செந்) தி நகரர் அக்கரம் ஆறுடையார் தெய்வ ஆரண

(தந்) தி நகரர் அர கர சத்தி இன்றாகில் அத் தேவர்

(நண்ப) தி ந கர ரக்கர் அதம் தீர்வர் ஈர்வர் செகமெங்குமே.

......... பதவுரை .........

தினகர ... பகன் பூடா என்னும் இரண்டு சூரியர்களுடைய,

அக்க ... நேத்திரத்தையும்,

ரதம் ... பல்லையும்,

கெடுத்தார் ... அழித்த சிவபெருமானுக்கு,

குரு தேசிகர் ... உபதேசம் செய்த ஞானாசிரியனும்,

செந்தி நகரர் ... செந்தில் பதியில் இருப்பவரும்,

அக்கரம் ஆறுடையார் ... ஷடாக்ஷரப் பொருளாய் இருப்பவரும்,

தெய்வ ... தெய்வீகமான,

ஆரண ... வேதங்கள் பூஜித்த,

தந்தி நகர் ... சர்ப்பம் போல் வடிவமுடைய திருச்செங்கோடு மலையை
ஆள்பவரும் ஆகிய கந்த பிரானின்,

அர ... அரத்தைப் போன்ற கூர்மையான,

கர சத்தி ... கை வேலாயுதம்,

இன்று ஆகில் ... இல்லை என்றால்,

தேவர் நண்பதி ... தேவர்களின் சிறந்த அமராவதி நகரம்,

ந ... இல்லாமல் போயிருக்கும்,

கர ரக்கர் ... வஞ்சனையை உடைய அசுரர்கள்,

அதம் தீர்வர் ... இறப்பைத் தவிர்த்திருப்பார்கள்,

ஈர்வர் செகமெங்கும் ... உலகம் முழுவதையும் நிர்மூலமாக்கி இருப்பார்கள்.

......... பொழிப்புரை .........

சிவ குருவாகி செந்தூரில் வாழ்பவரும், ஷடாக்ஷரப் பொருளாய் இருப்பவரும், செங்கோட்டு அதிபருமாகிய கந்தக் கடவுளின் திருக்கை வேல் வந்திராவிடில் அமராவதி அழிந்து போவது மட்டுமன்றி அசுரர்கள் ஸ்திரமாக வாழ்ந்து உலகம் முழுவதையும் அழித்திருப்பார்கள்.