பாடல் 16 ... சேவற் கொடியும்   (பிரிவு ஆற்றாமை)

......... பாடல் .........

      சேவற் கொடியும் பனிசாந் தகனுந் திருக்கரத்துச்
      சேவற் கொடியுங் கொடியகண் டாய்ததினை சூழ்புனத்துச்
      சேவற் கொடியுந் திவளத் தவளுந்தந் திக்களபச்
      சேவற் கொடியு முடையாய் பிரியினுஞ் சேரினுமே ...... 16

......... சொற்பிரிவு .........

சேவற்கு ஒடியும்பல் நிசாந்தகனும் திருக்கரத்து

சேவற்கொடியும் கொடிய கண்டாய் தினைசூழ்புனத்து

சேவல் கொடி உந்தி வளர்த்தவளும் தந்தி களப

சே வல் கொடியும் உடையாய் பிரியினும் சேரினுமே.

......... பதவுரை .........

சேவற்கு ... ரிஷப வாகனத்தை உடைய பரமசிவானல்,

ஒடியும் பல் ... பல் தகர்க்கப்பட்ட,

நிசாந்தகனும் ... (நிசி + அந்தகன்) பூஷா என்னும் சூரியனும்,

திருக்கரத்து ... உன் திருக்கையில் ஏந்தி இருக்கும்,

சேவல் கொடியும் ... கொடியாகிய சேவலும்,

கொடிய கண்டாய் ... பொல்லாதவைகளாய் இருக்கின்றன,

தினை சூழ் புனத்து ... தினைப் பயிர் நன்றாக வளர்ந்துள்ள கொல்லையை,

சேவல் ... காவல் புரியும்,

கொடி ... நீண்ட,

உந்தி வளர்த்தவளும் ... காட்டாற்றின் வளப்பத்தை அநுபவிப்பவளுமாகிய (வள்ளியையும்),

தந்தி ... ஐராவதத்தால் வளர்க்கப்பட்ட,

களப ... சந்தன சேறு பூசியிருக்கும்,

சே ... சிவந்த,

வல் ... சொக்கட்டான் கருவி போன்ற மார்பகமும்,

கொடியும் ... கொடி போன்ற இடையையும் உடைய (தேவசேனையையும்),

உடையாய் ... இரண்டு பக்கங்களிலும் சேர்த்துக்கொண்டு இருப்பவனே,

பிரியினும் ... உன்னைப் பிரிந்திருக்கும் போதும்,

சேரினும் ... உன்னிடம் கலந்திருக்கும் போதும்,

(கொடி கண்டாய் ... கொடியவைகளாய் இருக்கின்றன).

......... பொழிப்புரை .........

தக்க யாகத்தில் பரமசிவனால் தண்டிக்கப்பட்ட சூரியனும் உன் திருக்கரத்துக் கொடியாகிய சேவலும் என்னை வேதனைப்படுத்துகின்றன. உன்னைப் பிரிந்திருக்கும் பகல்பொழுது நீட்டிக்கும்படி செய்யும் சூரியனும் உன்னுடன் கலந்திருக்கும் இராக்காலம் சீக்கிரம் முடியும்படி கூவி பகல் பொழுதை கொண்டுவரும் சேவலும் எனக்கு எதிரிகள். வள்ளியையும் தேவசேனையையும் இருபக்கத்தில் வைத்திருக்கும் முருகனே எனது வேதனையை அறிந்து என்னையும் உன்னுடன் சேர்த்துக்கொள்.