பாடல் 5 ... தித்தவித் தார   (பிறவி ஒழிந்தது)

......... பாடல் .........

      தித்தவித் தார மனித்தரைத் தேவர் வணங்க முன்போ
      தித்தவித் தாரகை மைந்தர்செந் தூர்க்கந்தர் சிந்துரவா
      தித்தவித் தார முடையா ரருள்வெள்ளந் தேக்கியன்பு
      தித்தவித் தாரந் தனிவீ டுறத்துக்கச் செவ்வனலே ...... 5

......... சொற்பிரிவு .........

தித்த வித்தார மன் நித்தரை தேவர் வணங்க முன்

(போ) தித்த வி தாரகை மைந்தர் செந்தூர்க் கந்தர் சிந்துர

(ஆ) தித்த வி தாரமுடையார் அருள் வெள்ளம் தேக்கி அன்பு

(உ) தித்த அவித்தார் அம் தனிவீடு ற துக்கம் செ அனலே.

......... பதவுரை .........

தித்த வித்தார ... தித்த என்ற தாள ஜதி விரிவுகளை,

மன் ... தன்னுடைய நடனத்தின் மூலம்,

நித்தரை ... அழிவில்லாத நடராஜப்பெருமானுக்கு,

தேவர் வணங்க ... மற்ற தேவர்கள் எல்லாம் வணங்கும்படியாக,

முன் ... முன்னொருகாலத்தில் சுவாமி மலையில்,

போதித்த ... உபதேசம் செய்தவரும்,

வி ... விஷேசமான,

தாரகை மைந்தர் ... கிருத்திகை மாதர்களின் புதல்வரும்,

செந்தூர்க் கந்தர் ... செந்தில் ஆண்டவரும்,

சிந்தூர ... நெற்றிப் பொட்டை,

ஆதித்த ... சூரியனைப் போல் ஒளி வீசும்படி தரித்துள்ள,

வி தாரமுடையார் ... அற்புதமான இரண்டு தேவிமார்களை உடைய கந்தப் பெருமான்,

அருள் வெள்ளம் தேக்கி ... தன்னுடைய க்ருபா நதியை உள்ளத்தில் நிரப்பி,

அன்பு உதித்து ... பக்தியை மூளும்படி செய்து,

தனி வீடு உற ... ஒப்பற்ற மோட்ச வீட்டை நான் அடையும்படி,

துக்க ... பல துன்பங்களைத் தருகின்ற,

செ ... பிறப்பாகிய,

அனலே ... அக்னியை,

அவித்தார் ... அவியச் செய்தார்.

......... பொழிப்புரை .........

தேவர்கள் வணங்கும்படி ஈசனுக்கு பிரணவ உபதேசம் செய்தவரும் க்ருதிகா புத்திரரும் செந்திலாண்டவரும் வள்ளி தேவசேனா நாயகரும் ஆகிய குமரக் கடவுள் என் பிறப்பாகிய அனலை தன்னுடைய க்ருபா நதியின் மூலம் அவித்து நான் மோட்ச வீடு அடையச் செய்தார்.