_{திரு. இராஜூகோபால் (முன்னாள் ஆலயத் தலைவர்)
Thiru Irajoogopal, (former temple president)}

ஸ்ரீ பாலமுருகன் ஆலய வரலாறு

செபராங் ஜெயா திருத்தலத்தில், சீரும் சிறப்புமாய், தமிழ்க் கடவுளாம் ஸ்ரீ பால முருகனுக்கு புதிதாக, ஆகம முறைப்படியும், கலை எழில் மிளிரும் சிற்ப வண்ண வேலைப்பாடுகளுடனும் ஆலயம் எழுப்பி அகமகிழ குடமுழுக்கு காணும் இந்த நேரத்தில், இந்த ஆலயத்தின் கடந்த கால வரலாற்றை சிறிது எண்ணிப் பார்த்து விளக்க வேண்டியது நமது தலையாக கடமையாகும்.

கோயில் இல்லா ஊரில் குடியிருக்க வேண்டாம் என்பது நம் ஆன்றோர் வாக்கு, ஏறத்தாழ ₅₀ ஆண்டுகளுக்கு முன்னர், பிறை வட்டாரத்தில் வணங்கி வழிபட முருகப் பெருமானுக்கு ஒரு கோயில் இல்லையே என்ற கவலை போக்க, பக்தி உணர்வும், சேவை மனதும் கொண்ட அன்பர்களால் சிறிய அளவில் ஸ்ரீ பால முருகனுக்கு வழிபாட்டுத் தலம் அமைக்கப்பட்டது. இது ஜாலான் பாரு, ஸ்ரீ முனீஸ்வரர் ஆலயம் எதிர்புரமும், சை லெங் பார்க்கில் ஒரு பகுதியாக உள்ள இடமாகும்.

மக்களின் ஒருமித்த ஆதரவோடு முருகன் ஆலயம் படிப்படியாக வளர்ச்சி கண்டது. ₁₉₇₇-ஆம் ஆண்டு ஒரு முறையும் பிறகு ₁₉₈₆-ல் ஒரு முறையும் ஆலயம் திருப்பணி செய்யப்பட்டது. மேலும் அங்கு நாககன்னி அம்மனும் பிரவுடை செய்து வைக்கப்பட்டது.

ஆலய சார்பாக இளைஞர்களுக்கு தக்க பயிற்சி கொடுத்து பஜனைக்குழு, கோலாட்டக்குழு, ஆட்டக்காவடிக் குழு முதலியன அமைக்கப்பட்டது. குறிப்பாக பிறை ஸ்ரீ செல்வ வினாயகர் ஆலய சித்திரா பௌர்ணமி விழாக்களில் ஆண்டுதோறும் இவர்கள் பங்கு பெற்று பாராட்டு பெற்று வந்தனர்.

ஒவ்வொரு பௌர்ணமி பூசைக்கும் மாதா மாதம் சிறப்பாக முருகனுக்கு அபிஷேக, ஆராதனை அன்னதானம் நடைபெறும். ₅₀₀ பேர்கள் இந்நிகழ்வில் கலந்து பயன் அடைவார்கள்.

இருப்பினும் இவ்வாலயம் அமையப் பெற்ற இடம் பொதுமக்களுக்கு தக்க பாதுகாப்பு இல்லை என்கிற குறை உணரப் பெற்று, இருபது ஆண்டு காலம் பினாங்கு நில மேம்பாட்டு கடிதத்துடன் அடிக்கடி சந்தித்து பேசி, போராடி அவர்களின் மேலான ஒத்துழைப்புடன் தற்போதுள்ள இடம் வெள்ளி _68,000க்கு பெறப்பட்டது. இவ்வாலயம் அரசாங்கத்துடன் பதிவு செய்யப்பட்டதினால் இது சாத்தியமானது.

இவ்வாலயம் முழுமைபெற எல்லா வகையாலும் ஒத்துழைத்து, உறுதுணையாய் விளங்கிய அனைவருக்கும் மற்றும் நம் மக்களுக்கும், நாட்டிற்கும் எல்லாம் வல்ல ஸ்ரீ பால முருகனின் திருவருள் கிட்டிட பிரார்த்திக்கிறேன்.

திரு. இராஜூகோபால்,
தலைவர்,
ஸ்ரீ பால முருகன் ஆலயம்.

மலேசியா - பினாங்கு, செபராங் ஜெயா பாலமுருகன் துதிமாலை
(இயற்றிப் பாடியவர்: எல். வசந்த குமார், எம். ஏ.)

                           உ

ஞாலமெலாம் அருள்செய்யும் ஞானகுரு தேசிகனை
     கோலமா மயில்மீது குடிகொண்ட குருபரனை
          பாலமுருகப் பருவமாய் பவனிவரும் குருபரனை
               காலமெலாம் கைதொழுது கனிந்து உருகிடுவோம்

திருக்காட்சி தந்தருள திருத்தேரில் வந்தருளி
     அருட்காட்சி தந்தருளி அவனியெலாம் செழித்திடவே
          பெருங்காட்சிக் கோலமாய் பெயராது சிந்தையில்
               வருங்காட்சி வள்ளியரோடு வந்தனைகள் செய்திடுவோம்

பிணக்கங்கள் தீர்த்தருள பினாங்கு தனிலுறைந்து
     இணக்கங்கள் யாவையுமே இனியவுன் நினைவோடு
          மணக்கும் மலர்த்தாளை மகிழ்வோடு மனதினிலே
               வணக்கமாய் வந்தனைகள் செய்துனையே வழிபடுவோம்

ஓங்காரத்து உள்ளிருந்து உயர்ஞான ஒளியினையே
     நீங்காது நித்தலும் நிறைவுடனே அருளியருட்
          பாங்கான பதமலரைப் பணிவுடன் பற்றிடவே
               தேங்காத மடைநீராய்த் திறந்து வருபவனே

ஆறுருவாய் அவதரித்து ஓருருவாய் ஆனவனை
     நீறுருவாய் நெற்றியோடு நெஞ்சத்து உறைந்தாங்கு
          கூறுருவாய்ச் சூரனைக் குணமெலாம் மாற்றியருள்
               ஏறுருவ வாகனமாய் இனிதமர்ந்த நாயகனே.