பாடல் 51 ... சிகைத்தோகை   (திருமுருகாற்றுப்படையின் சிறப்பு)

......... பாடல் .........

      சிகைத்தோகை மாமயில் வீரா சிலம்புஞ் சிலம்பம்புரா
      சிகைத்தோகை மாமயில் வாங்கிப் பொருது திசைமுகன்வா
      சிகைத்தோகை மாமயில் வானில்வைத் தோய்வெஞ் செருமகள்வா
      சிகைத்தோகை மாமயில் செவ்விநற் கீரர்சொற் றித்தித்ததே ...... 51

......... சொற்பிரிவு .........

சிகை தோகை மா மயில் வீரா சிலம்பும் சிலம்பு

(அம்புரா) சி கை தோகை மா மய் இல் வாங்கி பொருது திசைமுகன்

(வா) சி கைத்து ஓகை மாமய் இல் வானில் வத்தோய் வெஞ் செரு மகள்

(வா) சி கைத்தோ கைமா மாயில் செவ்வி நற்கீரர் சொல் தித்தித்ததே.

......... பதவுரை .........

சிகை ... கொண்டையையும்,

தோகை ... தூவியையும் உடைய,

மா ... பெரிய,

மயில் வீரா ... மயிலை வாகனமாக உடையவனே,

சிலம்பும் ... கிரவுஞ்ச மலையையும்,

சிலம்பு ... முழங்குகின்ற,

அம்புராசி ... சமுத்திரத்தினிடத்தில்,

கை ... ஒழுங்கான,

தோகை ... மேல் கிளைகளை உடைய,

மா ... மா மரமாக நின்ற சூரபத்மனையும்,

மய் இல் ... இருளுக்கு இடமாகிய மாயையும்,

வாங்கி ... விலக்கி,

பொருது ... போர் செய்து,

திசைமுகன் ... நான்கு முகத்தை உடைய பிரம்மன்,

வாசி ... பிரணவப் பொருள் தெரியாமல் வேதத்தைக் கற்ற குற்றத்திற்காக,

கைத்து ... அவனைக் கோபித்து,

ஓகை ... பெரும் மகிழ்ச்சியை,

மாமய் இல் ... அழகுக்கு இருப்பிடமான,

வானில் ... தேவ லோகத்தில்,

வைத்தோய் ... விளைவித்தவனே,

வெஞ் செரு ... கொடிய போரில் வல்லவனாகிய (பாண்டிய மன்னனின்),

மகள் ... குமாரியின்*,

வாசி ... குதிரை முகத்தை,

கைத்தோ ... தீர்த்தவனே,

கை மா ... யானையாகிய ஐராவதத்தால் வளர்க்கப்பட்ட,

மயில் ... மயிலைப் போன்ற அழகுடைய தேவயானையின்,

செவ்வி ... கலவி இன்பத்தை விட,

நற்கீரர் சொல் ... நக்கீரர் சொல்லிய திருமுருகாற்றுப்படை,

தித்தித்ததே ... உனக்கு இனிமையாக இருந்தது போலும்.

......... பொழிப்புரை .........

மயில்வாகனனே, சூரபத்மனாகிய மா மரத்தையும் கிரவுஞ்ச மலையையும் மாயையையும் அடியோடு அழித்து அமராவதியில் மகிழ்ச்சியை விளைவித்தவனே, பிரம்மனை தண்டனை செய்தவனே, குதிரை முகத்தை உடைய பெண்ணின் முகத்தை மாற்றிய உனக்கு உன் தேவியாகிய தேவசேனையின் கலவி இன்பத்தைவிட நக்கீரரின் திருமுருகாற்றுப்படை உனக்கு இனிமையாக இருந்தது.

(* கலிங்க தேசத்து ராஜகுமாரி .. கனக சுந்தரி .. ஒருமுறை ஹயக்கிரீவரை ஏளனம் செய்ததால் அவளுக்கு மறுபிறவியில் பாண்டிய ராஜகுமாரியாக பிறந்தபோது மிக அழகுடன் மற்ற அவயங்கள் வாய்த்திருந்த போதும் முகம் மட்டும் குதிரையைப் போல இருந்தது. இதற்கு சாப நிவர்த்தியாக அவள் பல தீர்த்தங்களில் நீராடி வரும்போது திருச்செந்தூரில் சுவாமியின் முன்னிருக்கும் கடலில் நீராடியவுடன் அக்குதிரை முகம் மாறி மனித முகம் கிடைத்தது. அதனால் அந்த தீர்த்தம் வதனாரம்ப தீர்த்தம் என்று பெயர் பெற்றது).