(அகல நின்றதோர்)

அகல நின்றதோர் வீரமா காளனாம் அடலோன்
     உகவை யோடுறு சசியினை நோக்கிநின் னுளத்தில்
          தகுவர் தங்களுக் கஞ்சலை அன்னையுன் தலைவன்
               புகுதும் எல்லையும் அளிப்பன்ஈண் டுறைகென்று போனான். ......    1

(போன காலையிற்)

போன காலையிற் புலோமசை அடவியம் புறனோர்
     மானி னம்பிரிந் துற்றென அவ்வனம் வைகிக்
          கோன வன்வினை முற்றிய நோற்றனள் குறிப்பால்
               ஆன பான்மையை நாரத முனிவரன் அறிந்தான். ......    2

(மேலை வெள்ளி)

மேலை வெள்ளியம் பருப்பதந் தனில்விரைந் தேகிச்
     சீல விண்ணவர் தம்முடன் சிவனடி பரவக்
          கால மின்றியே இருந்திடும் இந்திரன் கடைபோய்
               ஞாலம் வைகிய புலோமசைக் குற்றவா நவின்றான். ......    3

(நவின்ற வாசக)

நவின்ற வாசகங் கேட்டலும் மகபதி நனியுட்
     கவன்று தேறியே முனிந்துபின் இறையருள் கருதி
          அவன்றன் மாமுறை தூக்கியே தன்னைநொந் தழுங்கித்
               துவன்ற தேவரோ டெழுந்தனன் அரன்புகழ் துதித்தே. ......    4

(வந்து நந்தியெம்)

வந்து நந்தியெம் மடிகளின் அடிமுறை வணங்கி
     அந்த மில்பகல் வேலைநோக் குற்றனம் அமலன்
          சிந்தை செய்தெமை யருள்புரிந் திடுகிலன் தீயேம்
               முந்தி யற்றிய தீவினைப் பகுதியை முன்னி. ......    5

(கைம்மை யாம்பெயர்)

கைம்மை யாம்பெயர் அணங்கினோர் பெறாவகை கறுத்த
     செம்மை யார்களத் தெம்பிரான் எமக்கருள் செய்வான்
          பொய்ம்மை தீர்தவம் இயற்றிட நிலமிசைப் போதும்
               எம்மை யாங்கருள் புரிந்தனை விடுத்தியென் றியம்ப. ......    6

(நன்று போமென)

நன்று போமென நந்தியெம் பெருந்தகை நவிலத்
     துன்று வானவர் தம்மொடுங் கழுமலந் துன்னி
          நின்ற வீரமா காளனைக் கண்டனன் நேர்போய்ச்
               சென்று புல்லியே முகமன்ஓர் அளப்பில செப்பி. ......    7

(போதி ஐயவென்)

போதி ஐயவென் றனையனை ஐயன்பாற் புகுத்தி
     மாது நோற்றுழிக் குறுகியே அவள்துயர் மாற்றிக்
          கேதம் எய்திய அசமுகி சூளுரை கேளா
               ஏது செய்வதென் றுன்னினன் இமையவர்க் கிறைவன். ......    8

(சுடர்ப்பெ ருங்குலி)

சுடர்ப்பெ ருங்குலி சத்திறை சூழ்ந்தனன் துணியா
     அடுத்த மங்கையை யுடன்கொடே விரைந்தவண் அகன்று
          புடைக்கண் வந்திடுங் கடவுளர் தம்மொடும் புராரி
               எடுத்த வார்சிலைப் பொற்றையிற் கரந்தனன் இருந்தான். ......    9

ஆகத் திருவிருத்தம் - 3425