பாடல் 88 ... செயலங்கை வாளை   (கண் நயந்துரைத்தல்)

......... பாடல் .........

      செயலங்கை வாளை யிறைகோயி லைச்சிவ னாரமுதைச்
      செயலங்கை வாளை முனிகொண்டல் வாளியைத் தேவர்பிரான்
      செயலங்கை வாளை முனைவேலை யன்னவிச் சேயுறையுஞ்
      செயலங்கை வாளை யுகள்செந்தில் வாழ்பவள் சேல்விழியே ...... 88

......... சொற்பிரிவு .........

செயல் அம் கை வாள் ஐ இறை கோயிலை, சிவனார் அமுதை,

செய லங்கை வாளை முனி கொண்டல் வாளியை, தேவர்பிரான்

செயல் அங்கை வாளை முனை வேலை, அன்ன. இச்சேய் உறையும்

செய அலம் கை வாளை உகள் செந்தில் வாழ்பவள் வேல் விழியே.

......... பதவுரை .........

செயல் ... சேற்றில் உண்டாவதும்,

அம் ... அழகுள்ளதும்,

கை ... ஒப்பற்றதும்,

வாள் ... ஒளி வீசுவதும்,

ஐ ... சிரேஷ்டதுமான,

இறை கோயிலை ... பிரம்மாவின் இருப்பிடமான தாமரையைப் போலவும்,

சிவனார் அமுதை ... சிவபெருமான் அமுதைப்போல உண்ட ஆலகால விஷத்தைப் போலவும்,

செய (ஜெய) ... வெற்றி நிரம்பிய,

லங்கை ... லங்காபுரியின்,

வாளை ... பிரகாசம் பொருந்திய அழகை,

முனி ... கோபித்து அழித்த,

கொண்டல் ... மேக வர்ணனாகிய ஸ்ரீராமனின்,

வாளியை ... பாணத்தைப் போலவும்,

தேவர் பிரான் ... இந்திரனின்,

செயல் ... போர் புரியும்,

அங்கை வாளை ... கையில் தரித்திருக்கும் உடை வாளைப் போலவும்,

முனைவேலை ... கூர்மையான வேலாயுதத்தைப் போலவும்,

அன்ன ... ஒத்திருக்கின்றன,

இச் சேய் உறையும் ... இந்த முருகக் கடவுள் வீற்றிருக்கும்,

செய் ... நிலத்தை (உழுகின்ற),

அலம் ... கலப்பையை,

கை ... மோதிக் கோபிக்கின்ற,

வாளை ... வாளை மீன்கள்,

உகள் ... ஊறுகின்ற,

செந்தில் ... செந்தில் பதியில்,

வாழ்பவள் ... வசிக்கின்ற (இப்பெண்ணின்),

சேலா விழியே ... சேல் கெண்டை மீன் போன்ற இரு கண்களுமே.

......... பொழிப்புரை .........

வாளை மீன்கள் கலப்பையை மோதுகின்ற வளப்பத்தை உடைய செந்தில் தலத்தில் வாழும் இப்பெண்ணின் கண்கள் இரண்டும் பிரம்மனின் வாசஸ்தலமான தாமரையைப் போலவும், ஆலகால விஷத்தைப் போலவும், ராம பாணத்தைப் போலவும், இந்திரனின் கை வாளைப் போலவும், வேலாயுதத்தைப் போலவும் கூர்மையாக விளங்குகின்றன.