பாடல் 85 ... சேர்ந்த மராத்துடர்   (சம்சார சேற்றில் இருந்து என்னைக் காப்பாற்று)

......... பாடல் .........

      சேர்ந்த மராத்துடர் தானவர் சேனையைத் தெண்டிரைக்கண்
      சேர்ந்த மராத்துடன் கொன்றசெவ் வேல திருமுடிமேற்
      சேர்ந்த மராத்துட ரச்சூடி மைந்த திளைத்திளைத்தேன்
      சேர்ந்த மராத்துட ரின்னாரி யென்னுமிச் சேறுபுக்கே ...... 85

......... சொற்பிரிவு .........

சேந்த, மராத்துடர் தானவர் சேனையைத் தெள் திரைக் கண்

சேந்து அ மராத்துடர் கொன்ற செவ்வேல, திருமுடிமேல்

சே இந்து அரா துள்தர சூடி மைந்த, திளைத்து இளைத்தேன்

சே, தமரா துடர் இல் நாரி என்னும் இச்சேறு புக்கே.

......... பதவுரை .........

சேந்த ... கந்தக் கடவுளே,

மராத்துடர் ... கடப்ப மாலையை அணிந்து,

தானவர் சேனையை ... அசுரர்களின் கூட்டத்தை,

தென்திரை ... தெளிந்த அலைகளை உடைய சமுத்திரத்தில்,

கண் சேந்து ... கண்கள் கோபத்தால் சிவந்து,

அ ... அந்த,

மராத்துடன் ... மா மரமாய் நின்ற சூரனுடன்,

கொன்ற செவ்வேல ... போரிட்டு கொன்ற அழகிய வேலாயுதத்தை உடையவனே,

திரு முடி மேல் ... அழகிய ஜடையின் மேல்,

சே இந்து ... இளம் பிறை,

அம் ... கங்கா ஜலம்,

அரா ... சர்ப்பங்கள்,

துள் தர ... இவைகள் எல்லாம் (நடனமாடும்போது) துள்ளிக் குதிக்கும்படி,

சூடி மைந்த ... சூடி இருக்கும் பரமசிவனின் குமாரனே,

தமராத்துடர் ... சுற்றமாக பற்றிக் கொள்ளும்,

இல் ... மனை வாழ்க்கை,

நாரி ... பெண்டிர்,

என்னும் ... என்று சொல்லப்படுகின்ற,

இச்சேறு புக்கே ... இந்தப் பிரபஞ்ச சேற்றில்,

திளைத்து இளைத்தேன் ... மெலிந்து வருந்துகிறேன்,

சே ... என்னைக் காத்தருள்வாயாக.

......... பொழிப்புரை .........

சமுத்திரத்தில் மா மரமாய் நின்ற சூரனையும் அரக்கர் சேனையையும் வென்ற கடப்பமாலை அணிந்த வீரனே, சென்னியின் கண் சந்திரனையும் பாம்பையும் கங்கா ஜலத்தையும் அணிந்திருக்கும் சிவபிரானின் குமாரனே, இல்லறச் சேற்றில் விழுந்து வழி தடவித் தெரியாமல் வருந்துகின்ற என்னை நீதான் காப்பாற்றி அருள வேண்டும்.